News Features

Mahasiswa Enggal Gladhen Kendel

Mawi Jurit malam

Minggu 22 september

wayah tengahing dalu wancine tiyang sami eca anggenipun sare, menapa malih wonten ing mangsa kados mangkene musime saweg rada asrep, angine ageng, tur padhang wulane. Ananging kangge para mahasiswa enggal Jurusan Pendhidhikan Basa Daerah angkatan 2013 boten ngraosaken raos kados makaten, amargi jam 01.00 WIB wonten ing wayah bengi sampun sami dipungugah saprelu nglampahi adicara  jurit malam ingkang mlebet wonten kegiatan MAKRAB PBD.

Jurit menawi dipuntingali  asal tembungipun menika saking basa kawi ingkang tegesipun perang. Malam menika dalu, dados jurit malam menika menawi dipun tegesi dados perang mungsuh petenging dalu. Jurit malam punika salah satunggaling adicara ingkang mlebet reroncening adicara Malam Keakraban utawa MAKRAB Jurusan Pendhidhikan Basa Daerah. Ngendikanipun Afwaz M. Afif minangka panawung Kridha Adicara MAKRAB,“Jurit malam katindakaken kanthi ancas saged mbentuk watak lan mental mahasiswa enggal supados langkung sae solah tingkah lakunipun dhumateng kakang lan mbakyu angkatanipun ugi dados sarana kangge ningkateken mental supados kendel ngadhepi pacoban”.

Adicara jurit malam kalampahan wonten ing tengahing dhusun Ambarbinangun, amargi adicara MAKRAB PBD ugi dipunadani winten Pondhok Pemudha Ambarbinangun, kecamatan Kasihan, Kabupaten Bantul. Jurit malam dipunwiwiti kanthi Budhalipun gugus setunggal urut setunggal, ingkang segugus menika isinipun wonten 15 mahasiswa enggal. Lampahing adicara menika boten wonten pemandhu gugus ingkang ngancani sesarengan kaliyan rombongan gugus mahasiswa enggal. Setunggal gugus menika namung dipunsanguni senter cacahipun kalih kangge pepadhang wonten ing petenging dalu lan peta kangge mangertosi arah rute jurit malam menika. amargi wonten jurit malam kasebat, para mahasiswa enggal menika dipuntuntut saged mandiri.

Wonten sekawan pos utawa tantangan ingkang dipunsamektakaken kanca-kanca panitia MAKRAB kangge jurit malam. Pos setunggal menika papanipun wonten komplek sasana laya dhusun Ambarbinangun, namanipun pos setunggal menika Pos Bima Suta. Wonten pos Bima Suta esensinipun mahasiswa Enggal Dipungladhi supados kendel anggenipun mlebet wonten komplek sasana laya menika. lajeng Pos kalih menika pos punakawan, papanipun wonten ing pinggir lepen. Mahasiswa enggal kedah mendhet toya saking lepen ambarbinangun kanthi cara estafet. Dados esensi-nipun saking pos punakawan ngajari tiyang supados saged gesang rukun bebrayan wonten madyaning masyarakat. Pos ingkang candhakipun menika pos tiga kanthi nama pos Harjuna Sasrabahu. Pos Harjuna Sasrabahu menika nyamektakaken dolanan kekompakan pergugus, ngengingi mahasiswa jaman sakmenika angel sanget supados kompak tumuju mring gesang ingkang mulya. Lajeng pos kaping sekawan utawa pos ingkang pungkasan inggih menika  Pos Wanara Seta. wonten ing pos pungkasan  mahasiswa enggal dipunmotivasi kanthi cara renungan saking para panitia. Dados para panitia paring stimulan awujud ukara-ukara kangge para mahasiswa enggal, ingkang ancasipun para mahasiswa enggal saged menggalih kanthi prayogi anggenipun ngadhepi pacoban. Adicara jurit malam menika katutup kanthi pratandhan saking adzan shubuh. Para panitia lan mahasiswa enggal sami senam sesarengan sabibaripun adicara jurit malam menika.

Jurit malam menika salah satunggaling adicara ingkang asring boten nate dipuntilar menawi wonten kegiatan-kegiatan organisasi babagan pendhidhikan. Amargi mawi jurit malam menika, saged dados sarana upgrading mental saha pakerti paratiyang anggenipun mlebet wonten ing swasana ingkang enggal khusuipun para mahasiswa enggal ingkang nembe kemawon mlebet wonten ing swasana perkuliahan wonten perguruan tinggi.

Ananging ingkang ampun kesupen bilih jurit malam menika kathah resikonipun, amargi dipunadani wonten wayah tengahing dalu. Ancaman awujud nyata utawa Ghaib dados tanggel jawabipun panitia. Fisik ingkang sayah kangge para mahasiswa enggal amargi kathah kegiatan wonten ing MAKRAB, khususipun mahasiswa estri ndadosaken lare estri asring kena prastawa kesurupan. Prastawa kesurupan menika ugi dados babagan ingkang wigati kangge panitia supados samekta njagi keamananipun jurit malam kaliyan sesepuh dhusun. Dados panitia menika kedah bener-bener saged ngecek keamananipun teknis jurit malam menika supados lakuning adicara jurit malam saged manggihi ancas ingkang dipunkajengaken.