Features

                 

Tradhisi Tajen

Tradhisi Adu Jagone Pulau Bali

Bali minangka salah sawijining tlatah ingkang anggadhahi kathah tradhisi ingkang unik tur endah. Salah satunggaling tradhisi menika wonten ingkang dipunwastani tradhisi Tajen utawa adu jago. Ewadene bilih adu jago menika boten pikantuk  menawi dipunpirsani kanthi dasaring hukum negara amargi kalebet main utawa judi. Ananging adu jago wonten Bali utawa Tajen menika saged kita tingali wonten pundi kemawon wonten tiyang rame-rame bekta ayam jago kangge dipun adu.

Mula bukanipun tradhisi tajen menika saking reroncen upacara dewa Yadnya ingkang kawastanan upacara Tabuh Rah, ewa semana upacara Tabuh Rah menika wonten syaratipun inggih wonten getih ingkang kedah tumetes, minangka dados pratandha nyucikaken manungsa saking sipat ingkang boten sae kados dene srakah, gumedhe, lan sapiturutipun. Ananging getih menika sanes getih manungsa ananging getih kewan, bentukipun mawi adu ayam Jago. Dados ayam jago kekalih dipun adu dumugi wonten getih ingkang tumetes. Saged medal getihipun amargi jalu ingkang wonten sikilipun ayam jago menika, dipunpasangi peso alit utawa gaman ingkang landhep supados saged damel tatu ayam jago lawanipun. Lajeng wonten makna ingkang owah saking adunipun ayam jago upacara tabuh rah sakmenika dados wonten unsuripun judi.

Samenika wonten ing Upacara Tabuh Rah kasebat dados asring dipunwontenaken kagyatan Tajen, tajen anggadhahi tata caranipun lan aturanipun ingkang sampun dipundamel kaliyan adat. Biasanipun wonten ing Tajen menika ayam ingkang kalah samangke saged dipun bekta wangsul kaliyan tiyang ingkang menangaken aduanipun. Ayam jago ingkang mati menika kaanggep dados Yadnya ingkang dipunaturaken dhumateng Bhuta ingkang saged ngreridhu pagesanganipun manungsa, Lajeng pungkasanipun kewan ingkang dipundadosaken yadnya utawa tumbal kasebat dipunpitadosi badhe minggah tingkatanipun wonten Reinkarnasi salajengipun kangge dados kewan sanesipun ingkang drajatipun langkung inggil utawa manungsa.

Tajen biasanipun dipunlaksanakaken wonten ing pura, papan aduan jago wonten ugi ing papan-

papan rekreasi. Kagyatan tajen menika boten winates umur, tiyang sepuh dumugi lare alit kathah ingkang sami tumut tajen menika. Tajen menika sejatosipun kalebet judi ingkang kedah dipun brantas amargi boten trep kaliyan norma hukum. Ananging kasunyatanipun tajen menika sampun dados Tradhisi ingkang tinurun saking jaman rumiyin wonten Bali.  Ugi wonten stigma wonten masyarakat Bali menawi judi menika dados simbol Eksistensi kejantanan. Tiyang kakung ingkang boten saged judi dipunanggep tiyang wandu, ugi wonten ing jaman rumiyin status sosialipun tiyang menika dipunukur saking kathah-kathahipun gadhah ayam jago aduan. Dados tajen utawa adu jago wonten Bali menika kasunyatanipun sampun dados tradhisi masyarakat ingkang boten saged dipunpisahaken saking masyarakatipun. Tradhisi Tajen teras dipunlestantunaken dening masyarakatipun sanadyan wonten dilematis antawisipun menika kegyatan ingkang sampun dados budaya ugi kegyatan ingkang boten trep kaliyan norma hukum wonten Indonesia.