Artikel: Kasarasan

Kunir minangka Obat Maag

Maag menika saking basa Belanda ingkang tegesipun lambung, papanipun wonten ing lebetipun padharan sisih inggil tengah pas pojok manah (tuntung ati). Lambung menika salah sawijining piranti saluran pencernaan, wujudipun kados kanthong, ginanipun kangge nadhahi, nyampur lan nglembutaken dhaharan  ingkang mlebet wonten ing padharan.

Kathah tiyang ingkang sami ngucap “lara maag” menawi padharan sisih inggil tengah tuntung manahipun sakit. Ingkang kamangka boten sedaya sakit padharan sisih inggil tengah menika ingkang sakit lambungipun. Wonten lelara ingkang tandhanipun memper sakit maag, saengga asring dipunkira sakit maag, inggih menika Serangan Jantung ingkang limrahipunnyerang tiyang ingkang sampun yuswanipun 40 taun minggah. Pramila kedah atos-atos menawi sakit maag wau dipunsarengi seseg napasipun, mumet, gemrobyos medal kringet ingkang adhem, dhegdhegan, menapa malih ngantos boten eling.

Tandha-tandhanipun sakit maag

Raosipun boten sekeca wonten ing pulung manah ngantos pinten-pinten jam, dinten, utawi minggu ingkang asring anfal, utawa terus-terusan. Nyeri, perih kados dipuniris-iris utawi kados dipunbrongot wonten ing pulung manah. Saged ugi  kraos sakit wonten ing sawingkingipun. Balung jaja lajeng mremen dumugi geger. Sakitipun saged suda, panggah sakit, utawi malah sakit sanget menawi padharanipun kisenan dhedhaharan. Wonten tiyang ingkang sakit maag suda sasampunipun saged mutah. Kejawi semengkrang pulung manahipun, tiyang ingkang ketaman sakit maag asring sambat padharanipun kebak terus, kembung. Dhahar sekedik raosipun cepet anggenipun tuwuk. Dhaharan ingkang mlebet kados boten purun medhak.asring medalaken gas liwat tutuk/antop/glegeken, muneg-muneg kraos badhe mutah, tuttuk raosipun kecut lan ababipun ngganda banget.

Jalaranipun sakit Maag

Wonten mapinten-pinten bab ingkang dipuntudhing dados jalaranipun sakit maag, ing antawisipun: murni gangguan saking lambungipun, wonten tatu ing lambungipun, merga ngunjuk obat-obatan kimia, ngeses (ngrokok), ngunjuk unjukan ingkang ngandhut alkohol, kekerepen ngunjuk kopi, unjukan berkarbonasi kadosta Cola, infeksi bakteri tartamtu, wonten cacing lan stress. Obat-obatan kimia ingkang saged marakaken sakit maag, ing antawisipun: obat rheumatik, obat asma, obat mumet, obat tambah darah ingkang ngandhut zat besi lan obat malaria. Stress kekathahen ingkang dipunpenggalih, ageng sanget pengaruhipun tumrap lambung.

Caranipun ngatasi:

1.      Sakit maag ingkang jalaranipun saking stress, supayanipun cepet mantun, stress kedah dipunatasi langkung rumiyin. Sebabipun menapa dipunpadosi ingkang njalarani. Sasampunipun ketemu enggal dipunrampungake.

2.      Dhahare kedah ajeg, manut jam-jam dhahar. Menawi padharanipun kraos kebak, anggenipun dhahar sekedhik-sekedhik ananging kerep.

3.      Tebihana dhaharan lan unjukan ingkang marakaken  perih ing lambung, kadosta: lombok, mrica, asem, kopi, unjukan berkarbonasi.

4.      Ampun ngeses/ngrokok.

5.      Ampun ngunjuk unjukan ingkang ngandhut akohol.

Manut panaliten, jeruk nipis dipunperes toyanipun banjur dipuncampur kaliyan madu kalih sendhok maem, dipununjuk pendhak enjing saderengipun dhahar, saged kangge tamba sakit maag. Saged ugi dipununjuki toya parutan kuniringkang sampun dipuncampuri gendhis jawi utawa madu. Saged ugi dipunpijet lambunge lan badan sisih wingking sainggilipun boyok.(alih basa saking kalawarti Panjebar Semangat dening M.Wahyu Hidayat PBD A 2011)